I sun Emma Moling y te chësc momënt sunsi tl laur da fá n master de cuntrabas – musiga classica tl conservatore de Den Haag tl’Olanda. Aper la musiga ái na gran pasciun por les munts. Le plü ion passi mi tëmp lëde amesa i crëps.
Cun 9 agn ai metü man da soné le cuntrabas tla scora de musiga cun Hans Peter Nocker.
Tl 2020 ái stlüt jö la laurea de trëi agn de cuntrabas tl conservatore Claudio Monteverdi a Balsan acompagnada y ispirada dal professur Rino Braia. I sun spo jüda inant cun mi stüdi ti Paisc Basc, olache al momënt sunsi tl porté a fin le master de contrabas tl Koninglijk Conservatoire Den Haag cun le professur Theotime Voisin.
La musiga y la natöra m’á arichí te deplü manires. Sëgn oressi partí chëstes esperiënzes cun d’atres porsones.
Dan da dui agn ái metü man da me dé jö cun le proiet LASSÖ. Al é n proiet che me stá a cör y che i porti inant cun gran pasciun y che i oress porté inant ince tl dagní. Mi jorman Luca é mort tl 2015 sot na lovina söl Valun. Da chël momënt inant ái albü le dejider da ti dediché n evënt spezial: insciö él nasciü LASSÖ – N conzert por te. I m’la conforti da me dé jö cun chësc proiet y da trasmëte recorc sonurs tles munts adöm cun d’atri musizisć.
